إجابة علي النوبي يوم 25-01-2024:
ضروري تعملوا تأمين دفنة لو مش عاملين، عشان محدش يضمن القدر.
لو لا قدر الله حصلت حالة الوفاة بعد ما بتكلم البوليس أو لو انت في المستشفى ... بتكلم شركة التأمين أو شركة الدفنة ... فيه شركات كتير لتأمين الدفن ... الاسلاميين منهم دول
https://www.arrahma.eu/nl/
https://halaluitvaart.nl/
وفيه شركات تانيه برضو زي
www.yarden.nl
www.monuta.nl
www.dela.nl
وفيه غيرهم كتير، اعمل بحث ب Uitvaartverzekering وشوف الحاجات اللي تناسبك إسلاميه او لا.
أو ممكن تكلم علطول الشركة المسؤولة عن الدفن والغُسل وما إلي ذلك زي ده و ممكن يكون فيه غيرهم
https://uitvaart-errahma.nl/
الشركة بتيجي تاخد الجثمان وبتغسّله وبتخلّص هي الورق وكل حاجه بعديها.
انت بيكون عندك إنك تقرر الدفنة هتكون فين، وده بيكون راجع ليك بس بيختلف في الوقت والتكلفة ... وعشان تعرف التامين بتاعك هيغطي ايه.
أولأ: الدفنة في هولندا:
فيه نوعين، النوع الأول هو مقابر المسلمين وده فيه اتنين منها واحدة في أرنم والتانيه في خرونينجن (وفيه ع الأرجح تالتة في ألميرا) ... وده بيكون قبر دائم للميت، وده تكلفتها وقت كتابة البوست حوالي 7000 يورو.
النوع الثاني وهي مقابر مؤقتة، وده بتكون مقابر للبلدية مش للمسلمين بس ... ولكن المسلمين بيكون ليهم زي حوش كده محدد ... وده بتكون مقابر لمدة 15 سنة، وبعد انتهاء المدة يا إما بتدفع تاني يا إما العظْم بيتشال وتتعمل المقبره لحد تاني (ده مش زي العضامة في مصر، هنا العظم بيتشال خالص) ده اختيار غير محبب للمسلمين ولكنه موجود وده تكلفته حاليا من 3500 ل 4000 يورو.
ثانياً: إرسال الجثمان لمصر:
الاختيار ده بياخد وقت أكتر لأنه بيحتاج يومين أو تلاتة إضافيين لتخليص الاوراق ... يوم من الخارجية الهولندية والسفارة المصرية ولازم يكون المتوفي معاه بطاقه أو باسبور مصري ساري ... ويوم كمان لشحن الجثمان، والدفنة بتكون بعديها بيوم كمان مثلاً.
الاختيار ده بيكلف من 3750 ل 4000 يورو ... ولكن لازم أي حد من الأهل أو الأصدقاء يكون هنا عشان بيمضي علي ورقة في السفارة المصرية، وكمان لازم البطاقة أو جواز السفر للمتوفي يكونوا ساريين.
آخر اختيار:
أعزنا الله وإياكم، في حالة إن الفلوس مش متوفرة هو الحرق ... ولكن طبعاً ده مش اختيار المسلمين بيختاروه، والناس كلها هنا بتساعد أي حد حتي لو معندهوش تأمين إنه يدفن أو يرسل الجثمان لبلده.
ده تقريباً كل التفاصيل اللي أعرفها ولا أراكم الله مكروهاً.