¶ ايه رأيكم مراتي تولد في هولندا وللا في مصر؟ وهل ال Kraamzorg هتفرق معاها بدل وجود أهلها حواليها؟ وإيه إجراءات تسجيل البيبي وعمل باسبور ليه وإقامة؟
اجابة خالد أحمد يوم 13/04/2023:
هنا الاهتمام اكتر اثناء الولادة وخصوصا القيصرية.
ال kraamzorg بتعمل كل حاجة في البيت (ربنا يرزقك بواحدة كويسة) من اول الكشف على الام والاهتمام بالمولود وممكن تجيلك 10 ايام بعد الولادة كل يوم من 3 - 8 ساعات حسب مانت عاوز وكله بتمنه بس لازم تتأكد من التأمين بتاع الام ممكن يغطي تكاليف كتيرة.
بعد الولادة بتاخد ورقة من المستشفى وتروح بيها للخيمينتة وتطلع شهادة ميلاد انترناشونال وتروح توثقها من الخارجية الهولندية في دنهاخ وتطلع توثقها من السفارة المصرية وبعدين تبعتها لحد من قرايبك في مصر. الجد او العم للمولود ممكن يستخرجوا شهادة ميلاد رقم قومي المولود من العباسية (تستلمها تاني يوم).
ماتنساش تبعت مع صورة للمولود 4x6 خلفيه بيضا مع شهادة الميلاد لمصر.
الف مبروك مقدما وان شاء الله ربنا يقوم زوجتك بالسلامة.
بخصوص الباسبور ممكن تقدم عليه من السفارة هنا في هولندا لو انت مستعجل تسافر بالمولود اي حتة غير مصر. السفارة بتاخد من 2 - 4 شهور عشان الجواز يوصل والتكلفة اعلى.
لو موش مستعجل طلع وثيقة سفر مجانا للمولود من السفارة المصرية بس لازم تسافر مباشر من هولندا لمصر.
ده رد السفارة لما حبيت اطلع وثيقة سفر للمولود
إجابة محمود سلمي يوم 13/04/2023:
موضوع ساعات ال kraamzorg ده بيعتمد على الشركة اللي انت متعاقد معاها و معاد الولادة. يعني لو فيه عليهم ضغط ممكن يدوك ال minimum اللي هو 24 ساعة و دول يدوبك كفاية لو انت اب جديد انك تتعلم ازاى تتعامل مع الطفل و ترعاه.
نقطة كمان لو الأم قعدت في المستشفى بعد الولادة كل يوم ده مخصوم من ساعات ال kraamzorg.
إجابة محمد سامي يوم 13/04/2023:
أنا دخلت في نفس الموال ده السنه اللي فاتت .. و الولاده كانت طبيعي .. فاخليني اعتبر انك نفس الموضوع ، الموضوع كله شكليات جداا انا كنت مترازل و مضغوط علشان بنتي الاولي اتولدت في مصر و طبعا العائله كلها حوالينا .. بس هنا انا في الولاده التانيه و طبعا فرق المستشفيات و المتابعه و الرلاده ذات نفسها سهل الموضوع اوي اوي. و برضه حاول تجيب اختها او مامتها لو عرفت بما انها اول ولاده فااكيد هاتبقي محتاج support.
إجابة حامد قناوي يوم 13/04/2023:
الولادة هنا أفضل من كل النواحي.
هنا المتابعة أفضل وبتعملها مع ال midwife = kraamzorg وهي بتبقى مسؤولة عن الأم طول فترة الحمل لحد بعد الولادة لغاية لما الأم تسترد عافيتها. الولادة في أغلب الحالات بتبقى طبيعي عكس مصر طبعا. ماتبقاش قيصري إلا في الضرورة القصوى. لو الأم عندها أي حاجة خارجة عن المألوف بتابع ساعتها مع المستشفى مش مع ال midwife.
ال kraamzorg بتيجي لمدة 8 أيام من بعد الولادة مباشرة لمدة 6 ساعات في اليوم ترعاك إنت والأم والمولود 😀. ده حقيقي هي بتيجي تحل محل الأم في البيت. بتيجي تنضف وتحضر الفطار وتطبق الغسيل وتغسل لوعاوز كمان. ده بجانب إنها بتساعد الأم في إنها تحمي المولود وتطمن عليه. كمان ال midwife بتيجي كذا مرة بعد الولاد علشان تطمن على المولود والأم. كل ده تبع التأمين.
بالنسبة لشهادة الميلاد الهولندي بتروح بعد الولادة غي خلال 3 أيام تطلعها من الخيمينتة بعدها بتروح توثقها من الخارجية الهولندية في دينهاخ بعدين توثقها في السفارة. بعدها تبعتها مع أي حد نازل مصر أو بال DHL لوالدك أو أخوك يطلعلك شهادة ميلاد مصري من مصر. ويبعتهالك هنا. القصة ديه بتاخد أسبوعين. لو عملتها من هنا ممكن تاخد 3 شهور. بعدها بتروح بالشهادة المصري على السفارة تطلع الباسبور وده بياخد ٣ شهور أو ٤ إنت وحظك.
إجابة أحمد يوم 13/04/2023:
اولا مبروك مقدما ربنا يخلي و يبارك.
ثانيا هنا الاهتمام احسن من مصر كتير فكره الولاده قيصريه هنا مستبده الا لو في سبب طبي (بيفضلوا الطبيعي) بعد الولاده هتحيبلك واحده البيت (kraamsorg) تساعد مراتك حسب التامين بتاعك ليك عدد ايام وساعات محدده اكتر من كدا هتدفع انا مراتي ولدت قيصرية والبنت كانت بتجيلنا لمده اسبوع مش عايز اقلك ولا اننا جايبين شغاله 
كنست الشقه و بتغسل مواعين و راحت جابت بنتي الكبيره من المدرسه.
ثالثا القانون اتغير و هيبفي ليك احازه ولاده مدفوعه 90% من قبل الحكومه و شركتك ممكن تتحمل ال 10% (اختياري للشركه) لمده 3 شهور تقدر تاخدهم ساعات او يام متفرقه او محمعه لحد ما الطفل يكمل سنه
باختصار هنا احسن بكتير من مصر ولو قدرت تجيب حد يبقي معاكم مامتها مثلا هيبفي احسن و احسن احنا كنا لوحدنا بس ربنا رزقنا بأسره مصريه جدعه صحابنا ساعدونا مع الاولاد.
نزول مصر بقي بالطفل سهله بعد ما تقوم بالسلامه تسجل البيبي و تعمل الاحراءات اللي تناسبك.
اعمل حسابك علشان هتتعقم وهيدخلوك العمليات مع المدام واول ما البيبي يتولد هيدوك المقص علشان تقص الحبل السري اوعى بقي تتخض و تعمل زي 😅
إجابة عمرو الخولي يوم 14/04/2023:
الف مبروك مقدما، انا لسه معدي بالتجربه دي بقالي اسبوعين اهو، الولاده هنا والمتابعه ممتازه جدا، والكرام زورغ ممتازين وهيعلموكم ازاي تتعاملو مع البيبي اكل وتغيير وهندله البيبي والكلام ده بجانب المهام المنزليه لو الام والبيبي تم هندلتهم وفي وقت، احنا تجربتنا معاهم كانت ممتازه، الست كانت بتيجي تاخده مننا الصبح ننام وتعمل كل حاجه في البيت وتعمل للام فطار لما تصحي فممتازين بصراحه.
والميد وايف هتعدي عليكو في البيت يوم ويوم تطمن علي الام بعد الولاده وتتاكد ان كل حاجه تمام.
بالنسبه للورق بتاخد ورقه من المستشفي انك ولدت فيها بيبقا فيها التاريخ والمعاد وكده وتروح بيها الخيمنته وتطلع شهاده ميلاد بعديها بيبعتولك رقم ال bsn في البريد من خلاله هتقدم بيه علي التامين الصحي والي هوه ببلاش او بيبقا علي تامينك يعني لحد سن 18.
بعد كده انا حاليا في خطوه اننا قدمناله علي الاقامه مع ال ind ابلكيشن اونلاين.
لسه انا ماخدتش شهاده الميلاد اختمها واعمله وثيقه السفر الخطوه دي لسه مامرتش بيها.
بالنسبه لاجازاتك هتاخد خمس ايام دول مدفوعين الاجر بالكامل من اول يوم الولاده وبعد كده ليك تسع أسابيع بسبعين في الميه من مرتبك تقدر تاخدهم ورا بعض كلهم او مثلا انا خدتها كل يوم جمعه في كل اسبوع فمده سنه تقريبا وبتقدمها في شغلك باخطر مديرك والاتش ار او لو في سيستم عندكم لكده في الشغل.
تجربتي مع شهاده الميلاد ماكنتش افضل حاجه لاسمه لان انا اسمي خماسي فلما جم همه يكتبوله اسمه شالو اخر اسم عندي الي هوه اسم العائله ودي حاجه عندهم في السيستم ماينفعش يعدلوها اخر اسم بيقع اوتوماتيك لان الاسامي اخرها عندهم خمس اسامي قي السيستم، لو انت اسمك رباعي مش هيحصل مشكله.