مافيش ورق مطلوب بس المهم تكون مسجلهم في البلدية، وده محتاج شهادات ميلادهم مترجمة ومعتمدة من السفارة الهولندية في مصر.
هيدخلوا المدرسة حسب سنهم والخمنتا اللي هي البلديه هتقولك علي اقرب مدرسة مناسبة ليك ... عادة هيدخلوا فصل دراسي مخصص للوافدين علشان يتعلموا اللغه، أو ممكن سنة في مدرسة لغة لمدة سنة.
حاول تيدا تتواصل مع المدارس وتتاكد ان عندهم اماكن للتسجيل للسنه الدراسية وفصول لغه. اديلهم كل التفاصيل عشان يفيدوك. أحياناً بيبقى فيه قوايم انتظار.
إجابة هشام يوم 23-05-2023:
المدارس في هولندا ليها نفس فكرة المدارس في مصر .. بتقدم خدمات قريبة من بعض .. بمعني ..
فيه مدارس حكومية زي مصر بتدي منهج حكومي زي Cito & Route8 للتبسيط و دي بتبقى الدراسة فيها باللغة الهولندية بس .. الانجليزي بيدخل للطلبة في سن كبير شوية زي فكرة المدارس الحكومة العربي في مصر لما بيدخلوا الانجليزي متأخر شوية .. المدارس دي في منها إسلامي و كاثوليكي ومنتسوري و كل حاجة .. بس في الأخر تعليم هولندي بقواعد هولندية.
في مدارس انترناشونال .. بتدي منهج انترنشونال (زي شهادة IB- IGCSE-SAT) او بيبقى عندها ساعات أقسام منهج هولندي برضه زي فكرة مناهج الناشونال والانترناشونال في مصر بالظبط .. دي مدارس غالية في الطبيعي سواء هتدرس منهج ناشونال أو انترناشونال.
في مدارس بايلنجول bi-lingual .. ودي بقا زي المدارس اللغات اللي كانت في مصر .. و دي بتدي اللغة الانجليزية من بدري للاطفال بس في الاخر برضه التقييم بيتم زي التعليم الهولندي
في نوع جديد من المدارس حاجة بين البايلنجول والانترناشونال بس ده مش منتشر اوي لسة .. هو مش بسعر الانترناشونال الغالي أو مجاني زي المدارس الحكومية .. ده اللي منظمة Salto بتحاول تعمله .. لحد دلوقتي ده تعليم ابتدائي بس .. الطلبة بتتعلم منهج مخلط بين الهولندي والانترنشيونال .. و الطالب في المرحلة اللي بعد ابتدائي هيبقى يقدر يدخل مدرسة انترننشونال يدرس منهج انترنشونال أو يدخل مدرسة هولندي يدرس منهج هولندي عادي.
مشكلة الأنظمة الكتير دي ايه؟ التعليم الهولندي في تقييمه بيقيس بيعتمد بدرجة كبيرة على اتقان الطالب للغة الهولندية (نفس فكرة المدارس الحكومة في مصر) .. مع الفارق ان فيه تقبل كبير ان مش كل الطلبة تدخل جامعة في أخر المطاف و عاادي ان الطالب يدخل معهد أو يتقن حرفة فبالتالي المميز أوي هو اللي هيدخل جامعة .. فبالنسبة للطلبة المغتربين ده موضوع شاق .. نفس فكرة انك جبت طالب هولندي ودخلته مدرسة حكومة في مصر وقلتله اعرب الجمل دي أو طه نق أوس تربيعي إلي أخره
أما التعليم الانترنشونال فده أصلا تعليم غالي سواء في أوربا أو مصر .. بس دي شهادة دولية تنفع في أي بلد أي طالب هيحب يكمل تعليمه فيها.
أما المدارس البايلنجول ده زي مقلنا أوبشن حلو زيادة على التعليم الهولندي ان الطالب هيدرس انجليزي من بدري .. بس هيمتحن في الأخر بالنظام الهولندي.
أخر نظام بتاع Salto ده أوبشن في النص المنظمة بتعمله فكرته الاساسية موجهة للناس اللي قاعدة فترة مش طويلة في هولندا فمش عايز يدفع فلوس الانترنشونال أو يدخل حكومة بالهولندي .. بس الطالب بعد ميخلص الابتدائية محتاج يقرر هو هيكمل في أنهي نظام
الموضوع كله في الاختيار انك تعمل نفس الخطة اللي كنت محتاج تعملها وانت بتقرر هتدخل ابنك مدرسة ايه في مصر .. مع الفارق ان التعليم الحكومي هنا في هولندا افضل من التعليم الحكومي المصري .. بس الفكرة واحدة في الاخر مع إختلاف اللغة اللي الطالب لازم يتقنها زي العربي وأحسن علشان يقدر يدخل جامعة.
للأسف نظام Salto لسة جديد مش منتشر برا Eindhoven .. معتقدش انه هيقدر ينتشر برا علشان بيعتمد على expats بدرجة كبيرة .. ودول متمركزين حوالين Eindhoven بسبب الشركات زي ASML وPhilips
اجابات أخرى
دا موقع المدارس الانترناشيونال علشان برضه تاخد فكره عن الاسعار و اماكنهم
https://www.iamexpat.nl/education/primary-secondary-education/international-schools-netherlands
دا هيديك فكره عن نظام التعليم هنا
https://www.iamexpat.nl/education/primary-secondary-education/dutch-school-system
دا علشان تعرف منه نسبه اللي الطلبه اللي بيدخله جامعه من مدرسه حكومه معينه في منطقتك
https://scholenopdekaart.nl/
كلنا كنا كده في الاول شايلين هم التعليم بسبب اللي كنا فيه في مصر، بس بتكتشف بعد كده ان الفرق مش كبير وان مدرسة هولانديه جنب البيت مع درس عربي وقران في البيت او الجامع هيبقي تمام وتريح دماغك ... ومستوي التعليم الهولاندي من افضل ١٠ علي مستوي العالم وبرضوا هيعرفوا انجليزي زي الهولانديين اللي بتتعامل معاهم بالانجليزي.
كل المدارس الحكوميه المتعلمين فيها ببلاش، الا لو هتوديهم انترناشيونال.
المدارس الانترناشيونال غاليه و السعر بيفرق حسب شريحه المرتب و الطفل التاني بياخد خصم في رائي لو حد مش هيقدر يدفع المصاريف لاولاده فالاحسن يدخلهم الاولاد مدارس هولندي او اسلامي و يعلمهم عربي خصوصا اذا ناوي يستقر في هولندا و يعيش هنا لكن لو ناوي يرجع مصر او ينقل و هيقدر يدفع مصاريف الانترناشيونال يكمل ، كدا ولا كدا لازم الاهل يراعوا و يخلو بالهم مع الاولاد علشان المعتقدات اللي تتنافي مع معتقداتنا و عادتنا.
إجابة محمد سامي يوم 23-05-2023
طيب تعالي نقلب الموضوع .. هل فعلا انت محتاج مدارس انترناشيونال؟ انت محتاج ترد علي اجابه كم سؤال علشان تعرف انت فعلا محتاج المدارس دي و لا لا ..
الموضوع مش زي مصر (من واقع خبرتي هنا) كنت جي عاوز ادخلها انترناشينوال و اتفشخر بقا و بنتي هاتتكلم كم لغه و الحته العنصريه الطبقيه المصريه كانت هي المسيطره جوايا .. بس بعد لف كتير عرفت ان اللي شغالين في السوبر ماركت الهولنديين بيتكلمو انجليزي اساسا احسن مني 😅 و دول تعليم حكومي عادي خالص .. فالموضوع بيتاخد من معااير تانيه مش معااير مصر.
المعاايير بتختلف من شخص لشخص .. كل واحذ ليه طروفه و معااييره الخاصه! في ناس بتحب الخليج اكتر علشان الضرايب و المرتبات ممكن اكتر .. في ناس بيفرق معاها المجتمع المسلم اكتر .. الانبساط و اللغه كلها حجات مالهاش مقياس .. ربنا يكرمنا باللي فيه الخير.
ده سؤال حلو .. في مصر تقدر تعمل كل حاجة بفلوس أو واسطة 😉
بس لو اتكلمنا على الصعوبات هيبقى صعب تنقل ابنك/بنتك من نظام اللغة الهولندية والامكانيات التعليمية اللي في هولندا لمدرسة حكومي أو لغات عادية في مصر .. والمدارس الانترناشيونال هتبقى عايزة مستوى انجليزي معين علشان تقبل النقلة دي .. بس بفرض انك هتوديهم مدرسة ناشيونال في مصر (ايا كان مستواها بقى) ف هما هياخدوا اعفاء من اللغة العربية سنتين تقريبا كمادة.
وبالنسبة للإعفاء من اللغة العربية للعائدين من الخارج، مطلوب:
بالنسبه للمصرى العائد من بلاد لا تتحدث اللغه العربيه ومكث بها اكثر من عامين متتاليين ويرغب فى الأعفاء المتدرج لابد من إحضار اخر شهادتين دراسيتين من هذا البلد وطلب من ولى الأمر (الأم او الأب )الرغبه فى الأعفاء
بالنسبه للمصرى العائد مزدوج الجنسيه الاجنبيه ويرغب فى الأعفاء النهائى من اللغه العربيه لابد من وجود ولى الأمريشترط (الأب) لكتابه طلب الأعفاء بالأداره التعليميه أو توكيل خاص للأم بالتعامل مع الأداره التعليميه لطلب الأعفاء النهائى