إجابة محمد سامي في 10-10-2023:
تعالى ناخد الموضوع من اوله، اللي انا عملته ان في حاجه هي المسؤوله عن كل الحضانات اللي من اول سنيتن اسمها partou و دي مترشقه في كل مدرسه و مكان .. عشان تسجل فيها و لما ابنك بيلاقي مكان بيكلموك و بيبعتولك يا برنس ابنك ليه مكان و اخرك ٤ ساعات في الاسبوع .. و برقم خرافي فانت بترد عليهم تقولهم لا انا مش باخد دعم من الحكومه ... هايقولك روح هات جواب من الضرايب بالincome بتاعك انت و مراتك و ده جيبته اونلاين عادي .. و التكلفه بقيت اقل من الربع في ظرف اسبوع.
الشباب بقا بتتكلم في حته انك ممكن تاخد ساعتين زياده فوق الاربعه عن طريق جواب تاني (اسمه VVE) بيقول ان الاهالي مفيش حد لغتهم الام الهولنديه و ده عندي في الخيمنته (ألميرا Almere) اتلغى ممكن تجرب عندك.
إجابة خالد أحمد في 10-10-2023:
هي بتختلف من بلدية للتانية ... الافضل انك تسجل المولود بعد مايتولد عشان فيه بعض الحضانات الانتظار فيها
سنة او سنتين. لما طفلك يكمل ٣ سنين وفيه مكان في الحضانة Peuterspeelzaal بتوديه يومين في الاسبوع.
ممكن تروح ال GGD وتطلب من ال consultantiebearu انك تاخد يومين زيادة عشان الأب والأم مابيتكلموش هولندي بس ممكن يرفضوا بحجة ان الأب والأم highly educated وان الطفل نموه كويس (حصلت معايا من ٣ شهور ورفضوا يدوا لابني اليومين الزيادة) مع ان من ٣ سنين بنتي اخدت اليومين الزيادة دول عادي. طبعا القوانين بتاعت البلدية عندنا Leiden اتغيرت عشان يوفروا وكمان الأماكن محدودة. فيه بلديات تانية بيدوا اليومين دول عادي من غير مناهدة.
إجابة أ. بسنت سمير في 19-12-2023:
ال kinderopvang او kinderdagverblijf الطفل بيقعد فيها اليوم كله من 7:30 الصبح ل 6:30 بالليل وبتبقي شاملة حتي الاجازات (وطبعاً حسب نوع العقد، دة كده العقد يوم كامل 52 اسبوع) بياكل ويشرب وينام ويقوم وكله هنا... ودة بيكون الأنسب لو الوالدين بيشتغلوا... النوع دة غير مدعم وغالي جداً فعلاً قطمة وسط وميزانية لوحده.. بالرغم إن بيكون ليكي حق لو الأبوين شغالين تقدمي علي toeslag حاجة زى معونة كدة فبيرجعوا شوية فلوس من اللي دفعتيها بس مش الرقم الفظيع يعني مقارنة بالرقم الأساسي اللي بتدفعيه.. دي بتاخد من بيبي (غالبا ٣ شهور بعد اجازة الوضع ما تخلص) لحد ٤ سنين.
ال peuterspeelzaal دي لكل الأطفال حتي لو الأم مش شغالة.. دي زي تمهيدي مدرسة كدة، وبيكون يومين بس في الاسبوع نص اليوم من 8:45 - 12:30 ولو الطفل مش لغته الأساسية هولندى وكمان الابوين اللغة لسة مجاتش ممكن تقدمى طلب في ال consultatiebureau علي حاجة اسمها VVE وبتاخدي ٤ ايام بدل ٢.. ودي من سن ٢ او ٢و٣ شهور (حسب البلدية اللي انتي تبعها) لحد ٤ سنين... وبرضو بياكل ويشرب عادى بس هى كلها قيمة ٣ ساعات يعني، بس بيتعود علي روتين المدرسة والتعامل مع أطفال تانيين... ودي مدعمة من الحكومة بتدفعى رقم مش كبير.
ونصيحة شخصية متواضعة، أنا اتفحت وجربت كل الأنواع تقريباً 😂 الحمد لله... فأنا جايالكم من المستقبل وبقول لأي أم بجد فكرى كويس أوى قبل قبل ما تاخدي خطوة الشغل وانتي عندك طفل صغير أصغر من سن المدرسة... الطفل في السن ده بيكون محتاج أمه جداً ، انتي كل حاجة في حياته وأيام وسنين مش هتتعوض فبلاش تضيعيها.. اشتغلي يومين بس لو خلاص مزنقة معاكى وهتموتي وتشتغلي بس انتى اللي هتخسرى حاجات كتير حلوة... الشغل بيروح ويجي والسن ما هو إلا رقم ومحدش كبير إنه يطور من نفسه ويرجع يشتغل تاني وهنا الحمد لله الثقافة الهولندية بتتفهم الموضوع دة، والفلوس بتروح وتيجي... أو ما بتجيش برضو 🤣 بس عادي ربنا بيرزق.
بس مش تتحبسي انتي وهو في البيت يعنى، خديه واخرجى روحي جناين، مزارع يشوف الحيوانات ، المكتبة ، دورى علي نشاطات.. انتو الاتنين هتتبسطوا.. خليه يشوف الدنيا بعنيكي 😉🥰