إجابة عمرو عدلي بتاريخ 5/1/2023:
فيه كذا تركاية كده في الموضوع كنت عايز أجمعهم من آخر تجربة ليا ففرصة:
١- ماينفعش تبدئي اجراءات السفارة قبل ٣ شهور من معاد السفر بس ينفع تجهزي الدعوة هنا وتبعتيها بدري عشان تكسبي وقت
٢- ابدئي دوري على معاد على vfs واحجزي من دلوقتي عشان دي خطوة مستفزة بسبب طريقة vfs في الشغل
٣- فيزا الأم والأب أسهل من الأخوات (السفارة بتستهبل وتقول مش ضامنين يرجعوا أو مش واضح سبب السفرية) اعملي حسابك ان فيه احتمال تترفض وتحتاجي تعملي تظلم وده بياخد وقت
٤- بناء على كده كل ما تبدئي بدري يبقى أفضل، وبم إن ماينفعش تبدئي قبل ٣ شهور فالتركاية هنا انك تطلبي فيزا مثلًا ٣ شهور مش شهر ، انتي عايزاهم يجوا شهر ٧ فقدموا على فيزا من -مثلًا- ١٥/٥ ل ١٥/٨ ده هيديكي شهر ونص بدري
٥- السفارة الأيام دي بتستهبل وتتأخر في كل حاجة (هو الحقيقة مش السفارة هو مركز الفيزا في أبوظبي)
٦- في حالتي فيزا والدي ووالدتي اتقبلت بسهولة، فيزا اختي وجوز اختي اترفضت، عملت تظلم في ال ind المفروض قانونًا يردوا بعد اسبوعين إلا لو فيه ضغط شغل فالقانون بيسمحلهم يمدوها ل ٣ شهور، طبعًا استغلوا النقطة دي ومدوها ٣ شهور، اتقبلت في الاخر بس بعد مابوظولي كل المواعيد
٧- السفارة متعاونة جدًا جدًا الحقيقة، بيردوا على الايميل بانتظام ولو حاجة مستعجلة بيردوا بسرعة، اختي وجوز اختي وهم قاعدين في vfs قالولهم على حاجة كده ماكنتش واثق فيها بعت ايميل للسفارة القنصل رد عليا في أقل من نص ساعة وهم لسه ماطلعوش من مكتب vfs حاولي تستفيدي منهم خاصة لو فيه عطلة من ناحية vfs
٨- مكتب vfs هو أسوأ حلقة في السلسلة كلها وأسوأ حاجة بعد أكل مال اليتيم خليكوا مصحصحين في التعامل معاهم
إجابة عمر عثمان بتاريخ 19-05-2023:
فيه ناس كتير بتسأل عن استقدام الوالد(ة) للزيارة، وفيه حد سألني على الخاص فقلت ممكن الكل يستفيد... أنا عملتها من أسبوعين لوالدتي. الكلام ده مكتوب في مايو 2023. لما تيجي تقرأ الكلام ده بعدين تأكد إن كل حاجة لسه سارية وكل الروابط شغالة. غير كده، اسأل هنا أو دوّر على اللي تغيّر.
تكلفة الموضوع لحظة كتابة المنشور 750 جنيه (حجز VFS) و80 يورو (التأشيرة نفسها، بتدفعها في المقابلة) و15 يورو تقريبا لتوثيق الطلب هنا في الـGemeente و110 جنيه إضافية لو عاوز جواز السفر يتبعت على البيت. الكلام المكتوب هنا مفترض إن أنت الـhost أو اللي هاتصرف على السفرية. في رأيي ده أحسن كتير وبيسهّل على الوالد(ة) عشان ما تتعبهمش معاك.
ما ينفعش المقابلة تكون قبل السفر الحقيقي بأكتر من 3 شهور. لو هايسافروا أول يناير مثلا، لازم تحجز إن المقابلة تكون بعد 1 أكتوبر. الحجز من [4]. المصدر الأساسي اللي بتبدأ منه وتنتهي إليه دائما هو [1]. ده اللي مكتوب فيه المطلوب منك، وممكن توقف قراءة هنا. أنا هافصّل شوية وهاضيف شوية نصائح من خلال تجربة والدتي (3 مرات)، بس [1] هو اللي بنسمّيه الـsource of truth.
حاجات مطلوبة:
املأ [2] وأعطِها للوالد(ة)، دي مش محتاجة توثيق وممكن يعملوها في (مصر) وأنت تساعدهم بالتليفون مثلا.
املأ [3] ووثّقها من الـGemeente بتاعتك أو أي Gemeente، في الغالب بتلاقي مكان فاضي في نفس اليوم لو بعدت شوية. أنا عايش في Capelle aan den IJssel ولما مش بالاقي مكان باروح Gouda، على بعد 9 دقائق بالقطار بس دائما بالاقي مكان في نفس اليوم. بتتكلف في حدود 15 يورو. لو مش عندك طابعة، روح بدري شوية وخدها من الـGemeente ببلاش واملاها هناك، بيكونوا طابعينها. وهاقول لك على pro-tip أعتقد إنها ساعدتني جدا: أنا كتبت في الوثيقة دي بوضوح (ومن غير ما يكون مطلوب) إني عاوز visa طويلة عشان والدتي تيجي تساعدني مع بنتي. على الرغم إن مفيش حاجة رسمية تسمح لي إني أكتب كده، كنت دائما باكتب عشان "أتحايل عليهم" يدّوني visa طويلة. أول مرة جاءت 3 شهور، تاني مرة طلبت سنة multiple entry وجاءت، والمرة دي طلبتها 5 سنين... دعواتكم!
الـbank statement بتاعك عن آخر 3 شهور (واكتب إن أنت اللي هاتصرف على السفرية كلها عشان الوالد(ة) ما يحتاجوش يعملوا هم الكلام ده).
إثبات من الشركة بتاعتك إنك لسه شغال هناك. اسأل الـHR عليها وطلّعها قبل المقابلة بحاجة بسيطة أوي عشان بيكون عليها تاريخ.
التأمين الصحي. لو جواز سفر الوالد(ة) عليه الملصق (sticker) بتاع (أمان)، يبقى تمام. اللي حصل مع والدتي إن جواز سفرها كان مدفوع فيه (أمان) عادي، بس الملصق ما كانش موجود. اضطرت تسيب المقابلة وتروح قسم (العجوزة) تاخده وترجع، والحقيقة الموضوع خلص في ثواني وأخدته وهي واقفة ﻷنها كانت دافعة أصلا. فتأكد من ده قبل ما الوالد(ة) يروح المقابلة.
قبل المقابلة بأقل من 24 ساعة (خلينا نقول 16 ساعة بالكتير عشان لو حصل أي تعطيل للمقابلة زي ما حصل مع والدتي بسبب قصة الملصق دي)، احجز تذكرة على EgyptAir في الفترة اللي أنت عاوزهم يسافروا فيها، واختار الدفع Fawri. ده هايخلي التذكرة سليمة لمدة 24 ساعة، وهم بيقبلوها عادي جدا في VFS. مش هاتدفع ولا مليم في الحوار ده، فلو التذكرة بمليون جنيه احجزها عادي.
صور شخصية Schengen (خلفية بيضاء، 3.5 * 4.5، مش فاكر بصراحة 4 صور ولاّ 6).
[تحديث] شهادة التحركات مطلوبة لو الوالد(ة) أول مرة يسافروا (أوروپا)، أو لو ضاع جواز سفرهم. ودي بتطلع من (العباسية) بدل (مجمع التحرير) رحمه الله.
حاجات ما عادتش مطلوبة بس قدّمناها عشان كانت معانا
حاجات بتقوّي الـapplication جدا
لو الوالد(ة) هاييجوا بعد (أو حتى قبل) ما جاءك مولود جديد: شهادة من الـmidwife بتاريخ الميلاد الحقيقي (بعد الولادة) أو المتوقع (قبل الولادة). النقطة دي بتقوّي الـapplication جدا وكانت من الـexceptions في وقت القرف بتاع الجائحة.
لو الوالد(ة) جاء قبل كده، صوّر الـvisas القديمة وكل اﻷختام اللي تثبت إنهم دخلوا (هولندا) وخرجوا منها في مواعيد سليمة، وإنهم ما كسروش visa ولا كلام من ده.
صوّر أي جواز سفر له علاقة. يعني إيه؟ والدتي مثلا أول visa لها كانت على جواز السفر اللي فات مش الحالي، فخليتها تروح المقابلة بالجوازين عشان تورّيهم أصل الـvisa اﻷولى. طبعا هي راحت بصور من كل ده عشان تدّيهم لـVFS في المقابلة.
أي حاجة لها علاقة بإثبات إن الوالد(ة) هايرجعوا (مصر). عقد شقة تمليك. عقد حاجة تمليك (أرض زراعية، محل، ...). عقد عمل لو لسه بيشتغلوا (والدتي مديرة مستشفى فقدّمت ما يثبت ده من نقابة اﻷطباء). مش لازم توثيق ولا ترجمة، بس طبعا أي حاجة مختومة أحسن. ولو معاك عشر حاجات من دول خدهم، مهم جدا يبقوا مرتاحين إنك مش جايبهم يكسروا visa ويعيشوا معاك مثلا.
أنا كنت فاكر إن عقد الشقة اللي أنت عايش فيها (سواء إيجار أو تمليك) مطلوبة. التعليقات أكّدت إنها مش مطلوبة، بس لو سهل عليك ابعت لهم في (مصر) حتى لو صورة منها، ﻹثبات الجدية وإنك فعلا عندك مكان كويس تستضيفهم فيه.
نصائح عامة
والد(تـ)ـك أغلى حد في حياتك، احمد ربنا إنه لسه ممتعك بيهم. أنا باطلب من والدتي دائما تروح وترجع بتاكسي، حتى لو أهلك معاهم سيارات هايتبهدلوا لو راحوا سايقين بسبب الركن. وطبعا ده سهّل عليها جدا لما اضطرت تروح قسم (العجوزة) وترجع.
لنفس السبب، ادفع 110 جنيه زيادة وأنت بتحجز عشان جواز السفر يتبعت لهم على البيت.
والدتي (71 سنة) اضطرت تستنى حوالي 45 دقيقة في الشارع لحد ما اضطرت تزعّق لهم وتقول لهم يخلوا عندهم دم ومراعاة لكبار السن. لو تقدر تروح معاهم المقابلة أو تخلي حد يروح معاهم يبقى كويس جدا، VFS ما عندهمش دم بصفة عامة ومش حاطين مكان انتظار أصلا. الشارع يساع من الحبايب ألف.
مش محتاج تشتري تأمين صحي، (أمان) كفاية. بس لازم يكون جواز السفر صالح للفترة اللي أنت عاوزها كلها. أنا طلبت 5 سنين visa لأن جواز سفر والدتي صالح لمده 5 سنين ونص تقريبا (لحسن الحظ!).
الشباب في التعليقات قالوا إن [3] مش لازم تتبعت (مصر)، وفيه تجارب شخصية ناجحة. أنا ما كنتش عارف كده، وبصراحة مش هانصح حد يروح المقابلة بصورة بس منها عشان ما تخليش الوالد(ة) في موقف سيء أمام موظف متعنّت ولاّ مش فاهم.
المصادر
[1] https://visa.vfsglobal.com/one-pager/netherlands/egypt/english/pdf/checklist-visa-application-visiting-family-and-friends-egypt.pdf
[2] https://consular.mfaservices.nl/assets/documents/pdf/forms/schengen_visa_application_form_english.pdf
[3] https://ind.nl/nl/formulieren/1310.pdf
[4] https://visa.vfsglobal.com/egy/en/nld